ဧရာဝတီတိုင်းဒေသကြီး ပုသိမ်မြို့နယ် ကြပ်ပေါင်ကျေးရွာမှ ပုသိမ်စက်မှုဇုန်ရှိ အထည်ချုပ်စက်ရုံတွင် လာရောက်လုပ်ကိုင်နေသူ အသက် ၂၀ အရွယ် အမျိုးသမီးငယ်တစ်ဦး ကိုဗစ်နိုင်တင်းရောဂါ သံသယလူနာအဖြစ် ပုသိမ်ဆေးရုံကြီးတွင် တက်ရောက် ကုသခံနေရကြောင်း ပုသိမ်ဆေးရုံအုပ်ကြီးက Myanmar Now ကို အတည်ပြု ပြောကြားသည်။
ဧပြီ ၂၃ နံနက် ၂ နာရီကျော်တွင် ပုသိမ်ဆေးရုံကြီးသို့ ရောက်ရှိလာခဲ့ပြီး ထိုအမျိုးသမီးငယ်ကို အထူးသီးသန့်ခန်းတွင် ထားရှိကုသနေကြောင်း ဓာတ်ခွဲနမူနာကို ရန်ကုန်ရှိ အမျိုးသားကျန်းမာရေး ဓာတ်ခွဲဌာနသို့ ပေးပို့ထားပြီး ကိုဗစ်နိုင်တင်းရောဂါပိုးရှိမရှိစစ်ဆေးနေကာ မနက်ဖြန် မနက်တွင် အဖြေသိရှိနိုင်မည်ဟု ယူဆကြောင်း ပုသိမ်ဆေးရုံအုပ်ကြီး ဒေါက်တာ သန်းမင်းထွဋ်ကပြောသည်။
“ချောင်းဆိုးတာ တစ်ခုပဲ။ ဖျားလည်းမဖျားဘူး။ နည်းနည်းမောတယ်။ အသက်ရှူကျပ်တယ်။ ကိုယ်လက်တွေ ကိုက်တယ်။ အဲဒါပဲရှိတယ် ” ဟု ၎င်းက ပြောသည်။
အဆိုပါ ကိုဗစ်နိုင်တင်းသံသယလူနာမှာ ပုသိမ်စက်မှုဇုန်ရှိ အလုပ်သမားထောင်ချီရှိသော အထည်ချုပ်စက်ရုံမှ အလုပ်သမားတစ်ဦးဖြစ်၍ ထိုစက်ရုံမှ အလုပ်သမားများအတွက် သာမကဘဲ ဧရာဝတီတိုင်းဒေသကြီး တစ်ခုလုံးအတွက်ပါ စိုးရိမ်စရာအခြေအနေ ဖြစ်သည်ဟု ရန်ကုန်တိုင်းအခြေစိုက် အလုပ်သမားအချင်းချင်း ရိုင်းပင်းကူညီရေးအဖွဲ့ (LHEO)မှ ဒေါ်ခခက ပြောသည်။
ဒေါက်တာ သန်းမင်းထွဋ်(ပင်းတယ မီးအိမ်ရှင်)က အဆိုပါ ကိုဗစ်နိုင်တင်းသံသယ လူနာအမျိုးသမီးမှာ ထိုစက်ရုံတွင် သင်္ကြန်ပိတ်ရက်များမတိုင်ခင် ဧပြီ ၈ အထိလုပ်ကိုင်ခဲ့သည် ဟု Myanmar Now ကို ပြောသည်။
ဧပြီ ၂၃ နံနက်ပိုင်း အထိ မြန်မာနိုင်ငံတွင် ကိုဗစ်–၁၉ အတည်ပြုလူနာ ၁၂၇ ဦးရှိပြီ ဖြစ်ကြောင်း ကျန်းမာရေးနှင့် အားကစားဝန်ကြီးဌာနက ထုတ်ပြန်ထားသည်။
မြန်မာနိုင်ငံတွင် ယနေ့(ဧပြီ ၂၃)နံနက်ပိုင်းအထိ ကိုဗစ်နိုင်တင်းရောဂါကြောင့် သေဆုံးသူ ၅ ဦး၊ ကုသမှုခံယူပြီးနောက် ရောဂါပိုးကင်းစင်သူ ၇ ဦးရှိပြီး စောင့်ကြည့်လူနာပေါင်း ၂၂၁၂ ဦးရှိကာ ရောဂါပိုးတွေ့ရှိသူ ၁၂၇ ဦးရှိကြောင်း ကျန်းမာရေးနှင့်အားကစားဝန်ကြီးဌာနက သတင်းထုတ်ပြန်ထားသည်။
